اول سموئیل Chapter 3

1. په هغو ورځو کې چې سموئیل د عیلي تر لارښودنې لاندې د څښتن خدمت کاوه د څښتن له طرفه پیغامونه او رویاګانې ډېرې لږې وې.

2. یوه شپه عیلي چې سترګې یې ډېرې کمزورې شوې وې او په سختۍ سره یې لیدلی شول په خپل ځای کې ویده ؤ.

3. څراغ لا مړ شوی نه ؤ خو سموئیل د خدای په کور کې ویده ؤ او هلته د خدای د لوظ سپېڅلی صندوق ایښودل شوی ؤ.

4. په دغه وخت کې څښتن غږ وکړ: <سموئیله! سموئیله!>سموئیل ځواب ورکړ: <زه دلته یم.>

5. هغه عیلي ته ورمنډه کړه او ویې ویل: <تا ماته غږ وکړ، زه دلته یم.>مګر عیلي ځواب ورکړ: <ما غږ نه دی کړی، بېرته لاړ شه او څمله.> نو هغه لاړ او څملاست.

6. څښتن بیا ورباندې غږ وکړ: <ای سموئیله!> او سموئیل راپاڅېده، عیلي ته ورغی او ویې ویل: <تا ماته غږ وکړ، زه دلته یم.>عیلي وویل: <ای زما زویه، ما تاته غږ نه دی کړی، بېرته لاړ شه او څمله.>

7. سموئیل لا تر دې وخته پورې څښتن نه پېژنده یعنې د څښتن پیغام ورته نه ؤ رسېدلی.

8. څښتن د دریم ځل دپاره په سموئیل باندې غږ وکړ. سموئیل پاڅېد، عیلي ته ورغی او ویې ویل: <تا ماته غږ وکړ، زه دلته یم.>نو بیا عیلي پوه شو چې څښتن په هلک باندې غږ کوي.

9. نو بیا عیلي سموئیل ته وویل: <لاړ شه، څمله او که چېرې هغه غږ وکړ ووایه: خبره وکړه ای څښتنه، ځکه ستا غلام یې اوري.> نو سموئیل لاړ او په خپل ځای کې څملاست.

10. څښتن راغی، ودرېد او د مخکې په شان یې غږ وکړ: <ای سموئیله! ای سموئیله!>سموئیل وویل: <خبره وکړه ځکه چې ستا غلام یې اوري.>

11. څښتن هغه ته وویل: <زه به اوس د اسراییلو په قوم باندې داسې کار وکړم چې هغه به ډېر هیبتناکه وي او هرڅوک یې چې واوري هغه به هک حیران شي.

12. زه به هغه ټولې خبرې چې د عیلي د کورنۍ په ضد مې کړې دي د اول نه تر اخره پورې سرته ورسوم.

13. ما پخوا هغه ته ویلي وو چې زه به تر ابده پورې د هغه کورنۍ ته سزا ورکوم په دې خاطر چې زامنو یې زما په ضد کفر ویلی دی. عیلي پوهېده چې هغوی دا کار کوي خو د هغوی مخنیوی یې نه کاوه.

14. له دې کبله د عیلي د کورنۍ دپاره مې قسم خوړلی چې د هغه د کورنۍ ګناه به هیڅکله د قربانۍ او یا نذرانو په ورکولو سره لېرې نه شي.>

15. سموئیل تر سبا پورې پروت ؤ او بیا هغه پاڅېده او د څښتن د کور دروازې یې خلاصې کړې. هغه ووېرېده چې عیلي ته د خپلې رویا په باره کې ووایي.

16. مګر عیلي په هغه باندې غږ وکړ او ویې ویل: <ای سموئیله! زما زویه!>سموئیل ځواب ورکړ: <زه دلته یم.>

17. عیلي پوښتنه وکړه: <څښتن تاته څه وویل؟ زما څخه یې مه پټوه، که چېرې هغه څه چې خدای تاته ویلي دي ماته ونه وایې نو خدای دې تاته سخته سزا درکړي.>

18. نو سموئیل هغه ته هرڅه وویل، د هغه څخه یې هیڅ شی پټ نه کړ. عیلي وویل: <هغه څښتن دی. هرڅه چې د هغه په نظر کې ښه ښکاري هغه دې وکړي.>

19. سموئیل لوئیده او څښتن د هغه سره ؤ. هرڅه وړاندوینه به یې چې کوله هغه رښتیا کېدله.

20. ټول اسراییلیان د دان څخه په شمال کې او تر بئرشبع په جنوب کې په دې پوه شول چې سموئیل په رښتیا سره د څښتن نبي شو.

21. څښتن به په شیلوه کې سموئیل ته ځان ښکاره کاوه او خپل پیغام به یې ورته رساوه.