Same Chapter 7

1. Jiova na noqu Kalou, vei kemuni au sa vakararavi kina; Ni vakabulai au mai vei ira kecega na via veilewaitaki au; ka mo ni vakagalalataki au,

2. De ra basuraki au me vaka sa daucakava na laioni vakamatailalai sara, io sa sega e dua sa vakagalalataki au.

3. Jiova na noqu Kalou, kevaka au sa vakayacora na ka oqo, kevaka sa tu e ligaqu na ca oqo,

4. Kevaka, au sa sauma na ca vei koya sa caka vinaka vei au, se vakalolomataka na tamata ni sa sega na vuna,

5. Laivi ira na meca me ra toboki au, ka siviti au; io, me butuki au sobu ki na qele, kei na noqu dokai ki na kuvu ni soso.

6. Ni tucake ena Nomuni cudru Jiova? O Ni sa cecere, ka levu ena vukudra na meca; mo Ni yadravi au tiko ena vuku ni lewa o ni sa vakatauca!

7. O ira nai soqosoqo levu ni tamata, era sa vakavolivoliti kemuni; ena vukudra, mo ni lesu talke ki na nomuni tikotiko vakaturaga.

8. O Jiova ena lewai ira na tamata, mo Ni lewai au mai Jiova, me vaka na Nomuni yalododonu, me vaka na dina sa tu vei au.

9. O Jiova ena lewai ira na tamata ca, me vakadeitaki na dodonu, ni sa vakatovolea na yalo kei na vakanananu kecega ni tamata na Kalou dodonu.

10. Na noqu taqomaki, sa mai vua na Kalou, sa vakabulai koya sa dodonu sara ena Yalona.

11. Na Kalou, sa Turaganilewa dodonu, ka sa daucudruvi ira nai valavala ca e veisiga.

12. Kevaka sa sega ni lesu tale mai o Koya, Na Kalou ena vakagata na Nona i sele; Na Kalou ena vakarautaka na Nona dakai.

13. Ena vakarautaka talega na i yaragi ni veivakamatei; ena cakava talega na Nona gasau me kama voli.

14. Raica, sa yavala na tamata ca ena ca, sa kunekunetaka na leqa, ka sa vakasucuma na lasulasu.

15. Sa kelia e dua na qara, sa kelia tiko ga, sa lutu ga kina o koya.

16. Sa lesuvi koya tale na nona leqa, kei na nona i valavala kaukauwa ena lutuka tale na uluna.

17. Au na vakavinavinaka vua na Kalou, ena vuku ni Nona yalododonu, au na seretaka na vakavinavinaka ki na yaca i Jiova, sa cecere sara.