Same Chapter 119

1. Sa kalouvinaka o ira sa sega ni cala ena sala, ni ra sa lako tiko ena vunau i Jiova!

2. Sa kalouvinaka o ira sa maroroya na Nona vosa, ka qarai Koya ena yalodra taucoko!

3. Era sa sega ni cakava e dua na ka ca; ni ra sa lako tiko ena Nona sala.

4. O Ni sa vakaroti keimami, me keimami maroroya na Nomuni lesilesi.

5. Me vakadodonutaki mada na noqu i lakolako me'u maroroya kina na Nomuni lesilesi!

6. Au na sega ni madua kina, ni'u sa vakaraica kece na Nomuni vakaro.

7. Au na vakacerecerei Kemuni ena yalo e dodonu sara, ni'u sa vulica na dodonu ni Nomuni vakatulewa.

8. Au na maroroya na Nomuni lesilesi; Mo ni kakua ni biuti au laivi!

9. Me vakasavasavataka vakacava na nona sala e dua na gonetagane? Ni sa qarauni koya me maroroya na Nomuni vosa.

10. Au sa qarai kemuni ena yaloqu taucoko, io, me'u sa kakua ga ni lako tani mai na Nomuni Vakaro!

11. Na Nomuni vosa au sa vunia ki na lomaqu, me'u kua ni valavala ca kina vei Kemuni.

12. Mo Ni vakacaucautaki Jiova! Mo Ni vakavulica vei au na Nomuni lesilesi.

13. Ena tebenigusuqu au sa tukuna oti na veika kece sa lewa na Gusumuni.

14. Au sa reki tiko e nai valavala ni Nomuni lesilesi, me vaka sa tu vei au nai yau kecega.

15. Au na vakanananu ki na Nomuni vosa ka na sega ni vakaqitora na Nomuni sala.

16. Au na vakamarautaki au ena Nomuni lesilesi; au na sega ni guilecava na Nomuni vosa.

17. Mo ni caka vinaka vua na Nomuni tamata, me'u bula kina ka maroroya na Nomuni vosa.

18. Mo ni dolava na mataqu me'u raica rawa kina na veika veivakurabuitaki sa tu ena Nomuni vunau.

19. Au sa rui vulagi ena vuravura oqo, Mo ni kakua ni vunitaka vei au na Nomuni veivakaro.

20. Na yaloqu sa kavoro ena gadreva DINA, ena veigauna kecega, na Nomuni lewa dodonu.

21. Mo Ni vunauci ira na dokadoka kei ira sa rukaki oti, o ira sa lako sese mai na Nomuni vakaro.

22. Mo Ni kauta tani vei au na veivakalialiai kei na veibeci, ni'u sa maroroya tiko na Nomuni tukutuku.

23. O ira na turaga lalai era sa dabe ka vosacataki au; ia, na Nomuni tamata, sa vakanananu tu ga ki na Nomuni vakaro.

24. Na Nomuni tukutuku sa vu ni noqu marau. Ka sa noqu daunivakasala talega.

25. Na yaloqu sa kabita na kuvunisoso; Mo ni vakabulabulataki au me vaka na Nomuni vosa.

26. Au sa vakaraitaka na noqui lakolako, ka o Ni sa sauma vei au; Mo Ni vakavulica vei au na Nomuni lesilesi.

27. Mo Ni vakavulici au me'u kila vinaka na Nomuni vunau; me'u dau vakanananu tu ki na talei ni Nomuni cakacaka.

28. Sa waicala na yaloqu ena vuku ni colacola bibi; Mo Ni vakaukauwataki au me vaka na Nomuni vosa.

29. Mo Ni kauta tani vei au nai valavala ni lasulasu, ka dolava vei au vakayalovinaka na Nomuni vunau.

30. Au sa digitaka na sala ni dina; na Nomuni lewa dodonu, au sa biuta tu oqo e mataqu.

31. Au sa kabita na Nomuni tukutuku; I Jiova, mo ni kakua ni vakamaduataki au!

32. Au na ciciva na sala ni Nomuni vakaro, ni oi Kemuni sa na vakalevutaka ga na yaloqu.

33. Mo Ni vakavulica vei au Jiova nai valavala ni Nomuni lesilesi, me'u maroroya kina me yacova nai vakataotioti.

34. Mo Ni solia vei au na kila vinaka, au na qai maroroya kina vaka vinaka na Nomuni vunau; io, au na muria e yaloqu taucoko.

35. Mo Ni bulia vei au na sala me'u lako voli kina ena Nomuni vakaro, ni'u sa rui taleitaka vakalevu.

36. Mo Ni vakota na yaloqu ki na Nomuni tukutuku, ka me kakua ki na kocokoco.

37. Mo Ni vukica tani na mataqu me kakua ni raica tiko na veika e sega ni yaga, ka vakabulabulataki au ga ki na Nomuni sala.

38. Mo Ni vakadeitaka na Nomuni vosa vua na Nomuni tamata, ni sa musuki koya oti tu ki na rerevaki Kemuni.

39. Mo Ni kauta tani na kequ i rogorogo ca ni'u sa sega ni taleitaka, ni sa dina ga na Nomuni lewa dodonu.

40. Mo Ni kila, ni'u sa gadreva dina na Nomuni vakavuvuli; mo Ni vakabulabulataki au me vaka na Nomuni yalododonu.

41. Me lako talega mai vei au na Nomuni yalololoma JiovaOna Nomuni veivakabulai me vaka na Nomuni vosa.

42. Me dua kina na i sau ni taro vua sa dauveivakalialiai vei au, Ni'u sa vakararavi ki na Nomuni vosa.

43. Mo Ni kua nai kauta tani na vosa dina mai na gusuqu, ni'u sa vakanuinui tiko ki na Nomuni vakaro.

44. Au na maroroya tikotikoga na Nomuni vunau me sega ni mudu.

45. Au na lako ena galala, ni'u sa vakasaqara tiko ga na Nomuni vunau.

46. Au na tukuna tikoga na Nomuni tukutuku ena matadra na tui, ka'u na sega ni madua kina.

47. Au na vakamarautaki au ena Nomuni vakaro, o koya au sa dau lomana.

48. Au na laveta cake na ligaqu ki na Nomuni vakaro, o koya au sa dau lomana, Au na vakanananu tu ga ki na Nomuni lesilesi.

49. Mo ni nanuma na vosa ni Nomuni tamata, o koya o ni sa vakavuna kina vei au na vakanuinui.

50. Oqo na noqu vakacegui ena gauna ni rarawa, ni Nomuni vosa sa solia vei au na bula.

51. O ira na dokadoka era sa vakavuna na noqu dau vakalialiai, ia, au sa dau sega ni vuki tani mai na Nomuni vunau.

52. Au sa dau nanuma na Nomuni lewa dodonu mai liu sara, i Jiova, oqo ga au sa dau vakacegui au kina.

53. Sa tarai au na taqaya, ni ra sa sega ni via muria na Nomuni vunau na tamata ca.

54. Sa dau noqu sere na Nomuni lesilesi, ena loma ni vale au sa vulagi kina.

55. Ena veibogi au sa dau nanuma na Yacamuni Jiova, au dau maroroya ga na Nomuni vunau.

56. Sa noqu tiko oqo, baleta ni'u sa maroroya na Nomuni vunau.

57. I Jiova, Oi Kemuni sa noqu i votavota; au sa tukuna oti, ni'u na maroroya na Nomuni vosa.

58. Au sa masuta na Nomuni veitokoni ena yaloqu taucoko; Mo Ni yalololoma vei au me vaka na Nomuni vosa.

59. Au sa dau vakananuma na noqu i lakolako, au sa vakagolea ga na yavaqu ki na Nomuni tukutuku.

60. Au sa vakatotolo ka sega ni vakaberabera me'u maroroya ga na Nomuni vakaro.

61. Na kedra i vesu nai valavala ca sa vauci au, au sa sega ga ni guilecava na Nomuni vunau.

62. Ena lomaloma ni bogi, au na tucake ka vakavinavinaka vei Kemuni, ena vuku ga ni Nomuni lewa dodonu.

63. Au sa nodra i tokani, o ira kecega sa rerevaki Kemuni, kei ira era sa dau maroroya na Nomuni vakavuvuli.

64. Sa sinai o vuravura ena Nomuni loloma, Jiova; Mo Ni vakavulica vei au na Nomuni lesilesi.

65. O Ni sa caka vinaka vua na Nomuni tamata, I Jiova, me vaka na Nomuni vosa.

66. Mo Ni vakavulica vei au na lewa vinaka kei na kila ka, ni'u sa vakabauta na Nomuni vakaro.

67. Ni se bera ni dau tarai au na dredre ni bula, au sa dau lewalewai au tu ga, oqo au sa qai maroroya na Nomuni vosa.

68. O Ni sa rui vinaka ka dau caka vinaka, Mo Ni vakavulica vei au na nomuni tukutuku

69. O ira na dokadoka era sa tukuna na lasu me baleti au. Ia, au na maroroya na Nomuni vakaro ena yaloqu taucoko.

70. O ira sa urouro na yalodra, ia, oi au, au sa taleitaka ga na Nomuni vakaro.

71. Sa yaga ka vinaka me tarai au na dredre ni bula, me rawa ni'u vulica kina na Nomuni lewa dodonu.

72. Nai vunau mai na Gusumuni e vinaka cake vei au mai na dua na udolu na tikini koula kei na siliva.

73. Na Ligamuni sa buli au ka tuli au, Mo Ni solia vei au na loma kasa, me'u vulica kina na Nomuni vakaro.

74. O ira sa rerevaki kemuni era na marau ni raici au, baleta ni'u sa nuitaka tikoga na Nomuni vosa.

75. I Jiova, au sa kila ni sa dodonu dina ga na Nomuni lewa, kei na Nomuni dau dina o Ni sa vakatovolei au kina ena ka rarawa.

76. Na Nomuni yalololoma kei na Nomuni yalovinaka sa yaco me'u vinaka kina, me vaka na Nomuni vosa vua na Nomuni tamata.

77. Me lako mai vei au na Nomuni yalololoma dina, me'u bula kina; Ni'u sa rui taleitaka dina na Nomuni vunau.

78. Me ra vakamaduataki na daubeitaki au vakailasu ka cala talega; au sa dau vakanananu tu ga ki na Nomuni vakaro.

79. O ira sa rerevaki Kemuni, me ra gole mai vei au, o ira sa kila na Nomuni tukutuku.

80. Me sa sega ni cala na yaloqu me vaka na Nomuni lesilesi, me'u kua ni madua kina.

81. Sa malumalumu na lomaqu ki na Nomuni veivakabulai, ia au sa vakanananu tu ga ki na Nomuni vosa.

82. Na mataqu sa malumu mai ni vakasaqara tiko na Nomuni vosa, au sa taroga kina, ni naica o Ni na vakacegui au kina?"

83. Au sa vaka na taga ni waini ena kubou ni kama, ia, au sa sega ga ni guilecava na Nomuni lesilesi.

84. Sa vo beka e vica na veisiga ni Nomuni tamata? O Ni na vakayacora na Nomuni vosa vei ira sa vakacacani au?

85. O ira na dokadoka era sa kelia na kequ qara, oqori sa sega ni vaka nai vunau.

86. Na Nomuni vakaro kecega sa dau dina; o ira oqo era sa vakacacani au vakailasu; Mo ni vukei au!

87. Sa voleka sara ni ra vakaoti au mai vuravura, raica, au na sega ga ni lako tani mai na Nomuni vakasala.

88. Mo Ni vakabulabulataki au me vaka na Nomuni yalololoma vakaidina, me rawa ni'u maroroya tiko ga kina nai tukutuku mai na Gusumuni.

89. Sa tudei ka sega ni mudu Jiova, sa vakadeitaki mai lomalagi na Nomuni vosa.

90. Na Nomuni dau dina sa tudei ki nai tabatamata kecega; o Ni sa tauyavutaki vuravura ka sa vakarorogo.

91. Era sa vakarorogo tikoga me vaka na Nomuni veivakaroti, era sa Nomuni dauveiqaravi kecega.

92. Baleta ga ni'u sa rui taleitaka na Nomuni vunau, e dodonu me'u a sa rusa sara ena noqu vakararawataki.

93. Au na sega ni guilecava na Nomuni vakaro, ni Kemuni a solia kina vei au na bula.

94. Au sa Nomuni, mo Ni vakabulai au, ni'u sa vakasaqara na Nomuni vunau.

95. Era sa waraki au na tamata ca me ra vakarusai au, ia au sa nanuma ga na Nomuni tukutuku.

96. Au sa raica na vakataudeitaki ni veika kece e taucoko, ia, na Nomuni vakaro sa uasivia na veika kece.

97. Au sa lomana dina na Nomuni vunau! Sa dau noqu vakanananu ena siga taucoko.

98. Oi Kemuni, ena Nomuni vakaro, sa vakavuna na noqu yalomatua cake mai vei ira na meca, Ni ra sa tiko ga kei au.

99. Sa levu na noqu kila vinaka sara mai vei ira kece na qasenivuli; baleta na Nomuni tukutuku sa veika ga au dau vakanananu kina.

100. Au sa kila na veika sa oti, na veika mai liu sara, baleta ni'u sa maroroya tikoga na Nomuni tukutuku.

101. Au sa tarova na yavaqu mai na veika kecega e ca, me'u maroroya ga kina na Nomuni vosa.

102. Au sa sega ni lako tani mai na Nomuni lewa, baleta ni Oi Kemuni ga sa vakavulici au.

103. Au sa tovolea oti na Nomuni vosa ka sa kamikamica dina, sa kamikamica cake mai na oni ena gusuqu!

104. Mai na Nomuni vosa, au sa rawata kina na kena kilai deivaki na ka; o koya oqo au sa besetaka kina na veika kecega e lasu.

105. Na Nomuni vosa sa cina ki na yavaqu ka sa rarama ki na noqu gaunisala.

106. Au sa yalataka ka vakadeitaka ni'u na maroroya na Nomuni lewa dodonu.

107. Au sa vakararawataki vakalevu; Mo Ni vakabulabulataki au, Jiova, me vaka na Nomuni vosa.

108. I Jiova, Mo Ni ciqoma na vakavinavinaka ni gusuqu, ka Mo Ni vakavulica vei au na Nomuni vunau.

109. Sa tikotiko ga e ligaqu na noqu bula, io, au sa sega ga ni guilecava na Nomuni vunau.

110. O ira na tamata ca era sa birika na kequ dai, ia, au sa sega ga ni lako tani mai na Nomuni lesilesi.

111. Na Nomuni tukutuku au sa taura me noqui votavota me sega ni mudu, ni ra sa ka ni reki dina ki na yaloqu.

112. Au sa nakita e yaloqu me'u vakayacora na Nomuni lesilesi, vakadua me sega ni oti rawa.

113. Au sa cati ira na lomaloma rua, au sa lomana ka taleitaka ga na Nomuni vunau.

114. Oi Kemuni na noqu i vunivuni kei na noqu i sasabai; au sa nuitaka na Nomuni vosa.

115. Dou lako tani vei au oi kemudou sa dau cakava na ka ca, ni'u na maroroya ga na i vakaro ni Kalou!

116. Mo Ni kua ni vakatara me'u madua ena vuku ni veika au sa nuitaka.

117. Mo Ni tauri au cake, au na qai taqomaki tiko, au na qai muria tiko na Nomuni lesilesi.

118. O Ni sa cati ira kece sa lako tani mai na Nomuni lesilesi, ni nodra ka ni veivakaisini na lasulasu.

119. O Ni sa biuti ira tani kece na tamata ca e vuravura me vaka na benu; o koya oqo au sa lomana ga kina na Nomuni tukutuku.

120. Sa sautanini na lewequ ena vuku ni rerevaki Kemuni, ni'u sa rerevaka na Nomuni lewa dodonu.

121. Au sa cakava na veika e dina ka dodonu; Mo Ni kua ni biuti au tu vei ira na dau veitabaki sobu.

122. Mo sai vakadei vei ira na wekamu ka me vakadua sara. Me kua ni ra vakabibitaki Au o ira na dokadoka.

123. Na mataqu sa sega ni rawata me vakasaqara tiko na bula mai vei Kemuni kei na Nomuni vosa vakadodonu.

124. Mo Ni tara na Nomuni tamata me vaka na Nomuni yalololoma, ka vakavulica vei au na Nomuni lesilesi.

125. Au sa Nomuni tamata, mo Ni solia vei au na loma kasa me'u kila kina na Nomuni tukutuku.

126. I Jiova, oqo mo ni qai cakacaka, ni ra sa taura na Nomuni vunau me vaka e dua na ka wale.

127. Au sa lomana na Nomuni vakaro me uasivi mai na koula, io, na koula dina!

128. Na Nomuni vakaro me baleta na veika kecega, au sa raica ni sa dina ka dodonu; au sa sega ni taleitaka kina na veika kecega sa lasulasu.

129. Sa rui taleitaki na Nomuni tukutuku; oqo sa vinakata ga kina na yaloqu me maroroya.

130. Ni sa curu yani na Nomuni vosa, sa solia na rarama; sa solia na kila deivaki vei ira na tamata wale.

131. Au sa dalaga ka cegu mada, ni'u sa gadreva dina na Nomuni vakaro.

132. Mo Ni raici au mai ka yalololoma mai, Ni sa Nomuni i valavala mo Ni dau lomani ira sa dau lomana na Yacamuni.

133. Mo Ni vakagolea na noqu i kalawa ena Nomuni vosa, me kua ni lewai au kina nai valavala ca.

134. Mo Ni vakabulai au mai na nodra veivakabobulataki na tamata, me'u maroroya kina na Nomuni vakaro.

135. Na Matamuni me serau tiko yani vua na Nomuni tamata, Mo ni vakavulica vei au na Nomuni lesilesi.

136. Na veiuciwai ni wai sa drodro sobu ga mai mataqu baleta ni o ira na tamata era sa sega ni via maroroya na Nomuni vunau.

137. O Ni sa dodonu sara, Jiova, na Nomuni lewa sa dodonu dina.

138. Na Nomuni tukutuku, o ni sa vakarota, sa dodonu sara qai dau dina.

139. Na noqu sasaga sa vesuki au, ni o ira na kequ meca era sa guilecava na Nomuni vosa.

140. Sa savasava sara na Nomuni vosa; na Nomuni tamata sa rui lomana vakalevu.

141. Au sa rui lailai ka beci, au sa sega ga ni guilecava na Nomuni vakaro.

142. Na Nomuni yalododonu, sa dodonu ka sega ni mudu, kei na Nomuni vunau sa ka dina sara.

143. Na leqa kei na rarawa sa siviti au sara, ia, na Nomuni vakaro sa ka ni reki dina vei au.

144. Na dodonu ni Nomuni tukutuku sa sega ni mudu; Mo Ni solia vei au na kila dina me'u bula kina.

145. Au sa tagi yani ena yaloqu taucoko; Mo ni rogoci au, Jiova! Au na maroroya na Nomuni lesilesi.

146. Au sa tagi yani vei Kemuni; Mo Ni vakabulai au, au na maroroya na Nomuni tukutuku.

147. Au sa duri cake ni bera ni kida na mataka ka tagica na veivuke; au sa nuitaka na Nomuni vosa.

148. Sa yadra tiko na mataqu ena noqu yadrava tiko na bogi, me'u cavuqaqataka tiko kina na Nomuni vosa.

149. Mo Ni rogoca na domoqu me vaka na Nomuni yalololoma. I Jiova mo Ni vakabulabulataki au me vaka na Nomuni lewa dodonu.

150. Era sa toso voleka mai o ira sa muria nai valavala ca; era sa yawa mai na Nomuni vunau.

151. O Ni sa rui voleka Jiova, na Nomuni vakaro kece sa dina.

152. Me baleta na Nomuni tukutuku, au sa kila makawa sara, ni sa i kemuni ga sa tauyavutaka me sega ni mudu.

153. Mo Ni raica na noqu vakararawataki ka sereki au, ni'u sa sega ni guilecava na Nomuni vunau.

154. Mo Ni nanuma na noqu i lakolako ka vakabulai au; mo Ni vakabulabulataki au me vaka na Nomuni vosa.

155. Na vakabulai sa yawa sara mai vei ira na daucaka ca, ni ra sa sega ni vakasaqara na ka o Ni sa lesia.

156. Sa rui levu na Nomuni yalololoma, Jiova; Mo Ni vakabulabulataki au me vaka na Nomuni lewa dodonu.

157. Sa levu sa daubeitaki au ka ra sa kequ meca talega, au sa sega ga ni gole tani mai na Nomuni tukutuku.

158. Au sa raica na veivakaisini ka'u sa rarawa kina vakalevu, baleta ni ra sa sega ni maroroya na Nomuni vosa.

159. Mo Ni kila mada na levu ni noqu lomana na Nomuni vakaro, mo Ni vakabulabulataki au me vaka na Nomuni loloma levu.

160. Nai soqoni taucoko ni Nomuni vosa na dina, na Nomuni lewa dodonu sa tudei ka sega ni mudu.

161. Era sa vakasaurarataki au na turaga ka sa sega na vuna, ia, na yaloqu sa tu ga ena Nomuni vosa.

162. Au sa rekitaka na Nomuni vosa, me vaka e dua sa kunea nai yau levu e talei sara.

163. Au sa besetaka ni maroroya na lasu, Au sa lomana ga na Nomuni vunau.

164. Vakavitu ena dua na siga, au sa dau vakacerecerei Kemuni, baleta na Nomuni lewa dodonu.

165. Na vakacegu levu sa nodra o ira sa dau lomana na Nomuni vunau, ni sa sega na ka e tu me ra tarabe kina.

166. I Jiova, au sa nuitaka ga na Nomuni veivakabulai, ka'u na cakava ga na ka o Ni sa vakarota.

167. Na yaloqu sa maroroya na Nomuni i tukutuku, ka au sa lomana dina sara vakalevu.

168. Au sa maroroya na Nomuni vakaro kei na Nomuni tukutuku, ni sa tu kecega e matamuni na noqu i valavala.

169. Me lako cake yani ki vei Kemuni Jiova na noqui tagi; Mo Ni solia vei au na kila ka me vaka na Nomuni vosa.

170. Me lako cake yani ki vei Kemuni na noqu vakatakerekere; Mo Ni sereki au me vaka na Nomuni vosa.

171. Na tebenigusuqu ena vakacerecerei Kemuni, ni Kemuni sa vakavulica vei au na Nomuni lesilesi.

172. Na yamequ ena tukuna ga na Nomuni vosa, ni sa dodonu kecega na Nomuni vakaro.

173. Na Ligamuni me sa noqu i vukevuke, ni'u sa digitaka na Nomuni vakaro.

174. Au sa gadreva na bula mai vei Kemuni Jiova, ni'u sa taleitaka na Nomuni vunau.

175. Me bula na yaloqu, ka'u na vakavinavinaka vei Kemuni; me vukei au na Nomuni lewa dodonu.

176. Au sa lako sese me vaka e dua na sipi; Mo Ni vakasaqara na Nomuni tamata, ni'u sa sega ni guilecava na Nomuni vakaro.