Same Chapter 118

1. Me vakavinavinakataki o Jiova, ni sa vinaka o Koya! Kei na Nona yalololoma sa tudei ka Sega ni mudu.

2. Me ra tukuna tikoga na Isireli, "Ni sa tudei ka sega ni mudu na Nona yalololoma."

3. Me ra tukuna tikoga na vale nei Eroni, "Ni sa tudei ka sega ni mudu na Nona yalololoma."

4. Me ra tukuna o ira sa rerevaki Jiova, "Ni sa tudei ka sega ni mudu na Nona yalololoma."

5. Au a kacivi Jiova ena gauna dredre, sa rogoci au o Jiova, ka sa vakadaberi au ena vanua vinaka.

6. Sa totaki au o Jiova, au na sega ni rere, Na cava ena rawa ni cakava vei au na tamata?

7. Na Kalou sa tiko ena kedra maliwa sa dau vukei au; o koya oqo au na raica na ka au gadreva vei ira sa cati au.

8. Sa vinaka na vakararavi vei Jiova, ka ca vei ira na tamata.

9. Sa vinaka na vakararavi vei Jiova, ka ca, vei ira na ravouvou.

10. E ra sa vakavolivoliti au na veimatanitu, ia, ena Yaca i Jiova, au na vakarusai ira.

11. E ra sa vakavolivoliti au, io, era sa vakavolivoliti au, io, ena Yaca i Jiova, au na vakarusai ira.

12. E ra sa vakavolivoliti au me vaka na oni era sa vakayali me vaka sa kama na vei co; ena Yaca i Jiova, au sa vakarusai ira kina.

13. Au sa biligi vakaukauwa, me'u bale kina, Ia, o Jiova sa vukei au.

14. O Jiova sa noqu kaukauwa, ka noqu sere talega, Ka sa yaco me noqu i vakabula.

15. Na domo ni reki kei na bula sa tiko ena nodra vale laca na yalododonu; na Liga Matau i Jiova sa cakacaka vakadodonu tiko.

16. Sa laveti na Liga i Matau i Jiova, na Liga i Jiova sa cakacaka vakadoudou tiko.

17. Au na sega ni mate, au na bula tikoga, Au na tukuna na cakacaka i Jiova.

18. Sa vakavulici au vakararawa o Jiova, ia sa sega ga ni soli au ki na mate.

19. Dolava vei au na matamata ni yalododonu; Au na curu kina, au na vakavinavinaka vei Jiova.

20. Oqo na matamata i Jiova, era na curu kina na tamata yalododonu.

21. Au na vakavinavinaka vei Kemuni, ni sai Kemuni ga sa rogoci au mai, ka o Ni sa noqu i vakabula.

22. NA VATU ERA A CATA NA MATAI NI VALE, SA YACO MEI VAKADEI ENA TUTU NI VALE.

23. Oqo na ka ga e cakava o Jiova, ka sa rui vakaqoroqoroi e matada.

24. Oqo na siga sa bulia o Jiova, eda na reki ka marau kina.

25. I Jiova, Mo Ni veivakabulai oqo, au kerea, I Jiova, Mo Ni veivakasaututaki oqo, au kerea.

26. Sa kalouvinaka o koya sa lako mai ena yaca i Jiova! Keimami sa vakalouvinakataki iko mai na vale i Jiova.

27. Sa Kalou o Jiova, sa solia vei keda na rarama, dou vauca na i soro ena dali, ena tutu e cake ni cabocabo ni soro.

28. Sai Kemuni na noqu Kalou, au na vakavinavinaka vei Kemuni; sai Kemuni na noqu Kalou, au na vakacerecerei Kemuni.

29. Solia na vakavinavinaka vei Jiova, ni sa vinaka ga o Koya! "Ni sa sega talega ni mudu na Nona loloma."