Same Chapter 145

1. Au na vakacaucautaki Kemuni na noqu Kalou, na noqu Tui; ena sega ni mudu na noqu vakavinavinaka ki na Yacamuni.

2. Ena veisiga kece au na vakacaucautaki Kemuni, ena sega ni mudu na noqu vakavinavinakataki na Yacamuni.

3. Sa levu o Jiova, e dodonu me vakavinavinakataki vakalevu; sa sega ni kilai rawa na kena levu.

4. Era na seretaka na Nomuni cakacaka na i taba tamata sa veitaravi, ka tukuna na Nomuni kaukauwa.

5. Au na tukuna tikoga na lagilagi ni Kemuni i rogorogo e Vakaturaga, kei na Kemuni i rogorogo e vakaqoroqoroi.

6. Na tamata era na veitalanoataka na qaqa kei na totoka ni Nomuni cakacaka. Au na tukuna na Nomuni cecere.

7. Era na tukuna tikoga na veika me nanumi kina na Nomuni loloma, ka seretaka na Nomuni daucaka dodonu.

8. Sa dauloma soli o Jiova, sa dauberabera ni cudru, sa rui levu na Nona loloma.

9. Sa yalovinaka o Jiova vei ira na tamata kecega; sa yacova na Nona cakacaka kecega na Nona yalololoma.

10. Na Nomuni cakacaka kecega era na vakavinavinaka vei Kemuni, Jiova, o ira na Nomuni tamata era na vakacaucautaki Kemuni.

11. Era na tukuna na lagilagi ni Nomuni Matanitu, ka veivosakitaka na Nomuni kaukauwa,

12. Ena vakatakilai vei ira na luve ni tamata na vinaka ni ka sa cakava o Koya kei na lagilagi ni Nona matanitu.

13. Na Nomuni Matanitu e Matanitu sa sega ni mudu. Kei na Nomuni lewa sa tudei ke nai tabatamata kecega.

14. O Jiova sa dau keveti ira sa malumalumu ka sa dauvakaturi ira cake na tamata sa vakacuvai sobu.

15. Na mata kece sa nanamaki vei Kemuni, ka o Ni sa solia na kakana ena kena gauna donu ga.

16. O Ni sa dedeka na Ligamuni, ka vakamaumautaka na gagadre ni ka bula kecega.

17. Sa dodonu sara o Jiova ena Nona veika kecega. Sa vakayalovinakataka na cakacaka ni Ligana kecega.

18. Sa voleka sara o Jiova vei ira sa dau masuti Koya; vei ira sa dau masuti Koya vakaidina.

19. Ena sotava na nodra gagadre o ira sa rerevaki Koya; ena rogoca tale ga na nodra tagi ka vakacegui ira.

20. O Jiova sa daumaroroi ira sa lomani Koya, o ira na tamata ca, era na vakarusai.

21. Na gusuqu ena tukuna na vinaka nei Jiova, me ra vakacaucautaki Koya na ka bula kecega, mai na gauna oqo ki na gauna kecega.