Same Chapter 62

1. E dina, na yaloqu sa waraka kemuni tikoga na Kalou; mai vei koya ga sa lako mai kina na noqu vakabulai.

2. Sai koya ga na noqu Vatudei kei na noqu i vakabula; sai koya na noqui sasabai, au na sega ni vakayavalati vakalevu kina.

3. Na cava soti na dede ni nomudou via valuta na tamata? Dou na vakabalei kecega, me vaka e dua na lalaga sa ravi wale tu kei na wai sa yavavala vakalevu.

4. Era sa bose mera vakabalei koya mai na nonai tikotiko cecere; era sa marautaka na lasu; era sa veivosakitaka ena gusudra, ia, na lomadra sa vuvu ga. Sela

5. Na yaloqu sa waraka lo tikoga na Kalou, na noqu nanamaki sa lako mai vua.

6. Sai koya ga na noqu Vatudei kei na noqu i vakabula; o koya na noqui sasabai; au na sega ni yavalati rawa.

7. Sa tiko vua na Kalou, na noqu vakabulai kei na noqui serau; na vatu ni noqu kaukauwa, sa noqui drodro na Kalou.

8. Oi kemudou na tamata, dou vakadinati koya ena gauna kecega; dou sovaraka na yalomudou. Sa noda i drodro na Kalou. Sela

9. Sa dina na tamata lolovira, sa cawa ga, na tamata sa tu e cake sa ka lasu, kevaka era sa vakarautaki, era sa mamada sara me vaka mai na cawa.

10. Kua ni vakabauta na veivakalolomataki se veivakarusai kei na butako ena valavala kaukauwa. Ke sa levu nai yau, kua ni vakagolea kina na yalomu.

11. Sa vosa oti na Kalou, au sa rogoca vakarua, sa Nona na Kalou na kaukauwa.

12. Io, sa nomuni talega na kalou, na yalololoma, o Ni sa solia ga vua na tamata me vaka na nonai valavala.