1 Korintubréf Chapter 16

1. En hvað snertir samskotin til hinna heilögu, þá skuluð einnig þér fara með þau eins og ég hef fyrirskipað söfnuðunum í Galatíu.

2. Hvern fyrsta dag vikunnar skal hver yðar leggja í sjóð heima hjá sér það, sem efni leyfa, til þess að ekki verði fyrst farið að efna til samskota, þegar ég kem.

3. En þegar ég svo kem, mun ég senda þá, sem þér teljið hæfa, með líknargjöf yðar til Jerúsalem, og skrifa með þeim.

4. En ef betra þykir að ég fari líka, þá geta þeir orðið mér samferða.

5. Ég mun koma til yðar, er ég hef farið um Makedóníu, því að um Makedóníu legg ég leið mína.

6. Ég mun ef til vill staldra við hjá yður, eða jafnvel dveljast vetrarlangt, til þess að þér getið búið ferð mína, hvert sem ég þá kann að fara.

7. Því að nú vil ég ekki sjá yður rétt í svip. Ég vona sem sé, ef Drottinn lofar, að standa við hjá yður nokkra stund.

8. Ég stend við í Efesus allt til hvítasunnu,

9. því að mér hafa opnast þar víðar dyr og verkmiklar og andstæðingarnir eru margir.

10. Ef Tímóteus kemur, þá sjáið til þess, að hann geti óttalaust hjá yður verið, því að hann starfar að verki Drottins eins og ég.

11. Þess vegna lítilsvirði enginn hann, greiðið heldur ferð hans í friði, til þess að hann geti komist til mín. Því að ég vænti hans með bræðrunum.

12. En hvað snertir bróður Apollós, þá hef ég mikillega hvatt hann til að verða bræðrunum samferða til yðar. En hann var alls ófáanlegur til að fara nú, en koma mun hann, er hentugleikar hans leyfa.

13. Vakið, standið stöðugir í trúnni, verið karlmannlegir og styrkir.

14. Allt sé hjá yður í kærleika gjört.

15. Um eitt bið ég yður, bræður. Þér vitið að Stefanas og heimili hans er frumgróði Akkeu og að þeir hafa helgað sig þjónustu heilagra.

16. Sýnið slíkum mönnum undirgefni og hverjum þeim er starfar með og leggur á sig erfiði.

17. Ég gleðst yfir návist þeirra Stefanasar, Fortúnatusar og Akkaíkusar, af því að þeir hafa bætt mér upp fjarvist yðar.

18. Þeir hafa bæði glatt mig og yður. Hafið mætur á slíkum mönnum.

19. Söfnuðirnir í Asíu biðja að heilsa yður. Akvílas og Priska ásamt söfnuðinum í húsi þeirra biðja kærlega að heilsa yður í Drottins nafni.

20. Allir bræðurnir biðja að heilsa yður. Heilsið hver öðrum með heilögum kossi.

21. Kveðjan er með eigin hendi minni, Páls.

22. Ef einhver elskar ekki Drottin, hann sé bölvaður. Marana ta!

23. Náðin Drottins Jesú sé með yður.

24. Kærleikur minn er með öllum yður í Kristi Jesú.