1 Veigauna Chapter 13

1. Sa qai bose o Tevita vata kei ira na kavetani ni lewe udolu kei na yadrau, vata kei ira talega nai liuliu kecega.

2. Ia sa tukuna o Tevita ki vei ira nai soqosoqo kecega e Isireli, "Kevaka sa vinaka vei kemuni, ia kevaka talega sa vu mai vei Jiova na noda Kalou, meda vakatadu mata vei ira na wekada kecega sa vo e na vanua taucoko o Isireli, kivei ira talega na bete kei na Livai era sa tiko ena nodra veikoro kei na vanua bulabula, mera na soqoni vata mai kike vei keda;

3. "ka da kauta lesu tale mai na kato ni noda Kalou vei keda, ni da se sega mada ni bau taroga tale me tekivu mai na gauna i Saula."

4. Era sa qai tukuna nai soqosoqo taucoko ni ra na cakava vakakina, ni sa dodonu na ka o ya e na matadra na tamata kecega.

5. Sa mani vakasoqoni ira kece mai na Isireli o Tevita, mai Siori e Ijipita me yaco vaka ki nai curucuru mai Emaci, me ra kauta lesu na kato ni Kalou mai na vanua o Kiriaci-Jearimi.

6. Ka sa lako cake o Tevita kei ira kecega na Isireli ki Peala, ki Kiriaci-Jearimi, ka sa nei Juta, me ra kauta yani mai kea na kato ni Kalou o Jiova, o Koya sa tiko ena kedrau maliwa na Jerubimi, na vanua sa cavu kina na Yacana.

7. Era sa mani kauta na kato ni Kalou ena dua na qiqi vou mai na vale i Avinatave, ia o Usa kei Aio e rau liuataka na qiqi.

8. Sa qai qiria nai vakatagi o Tevita kei ira na Isireli ena mata ni Kalou ena nodra i gu taucoko, era lagasere, qiri api, nai vakatagi vakawa, na tibereli, na sibali, kei na davui.

9. Ia ni ra sa yaco ki na vanua ni butu sila i Kidoni, sa dodoka na ligana o Usa me taura na Kato, ni sa tarabe na bulumakau.

10. Sa qai waqa vakalevu na cudru ni Kalou vei Usa, sa mokuti koya ni sa dodoka na ligana me tara na kato; ka sa mate mai kea o koya ena mata ni Kalou.

11. Ia sa rarawa sara o Tevita baleta ni sa vakamatei Usa o Jiova; sa mani vakatokai kina na vanua o ya o Veresi-Usa me yacova mai na siga oqo.

12. Sa rerevaka na Kalou o Tevita e na siga o ya, ka tukuna, "E rawa vakacava ni'u kauta mai na kato ni Kalou kivei au?"

13. Sa mani sega ni kauta vei koya o Tevita na kato ni Kalou ki na Koro i Tevita, ia sa kauta vakatikitiki ki na vale i Opeti-Itomi na Kitaite.

14. Sa tiko ga na kato kei iratou na vuvale i Opeti- Itomi mai na loma ni nodratou vale me vula tolu. Ka sa vakalouvinakataka o Jiova na vale i Opeti- Itomi kei na ka kece e tu vua.