1 Tawarikh Chapter 25

1. Keu teupimpén upacara-upacara iébadat, Nabi Daud dan bandum peumimpén ureuëng Lewi laju geupiléh kawöm-kawöm Lewi nyang teupeugah nyoe: Asaf, Heman dan Yedutun. Awaknyan geubri tugaih keu jijak peusampoe peusan nibak Po teu Allah sira ji-iréng deungon su musik keucapi, rapa-i gambus dan simbal. Keu teupimpén iébadat deungon upacara jihnyan maséng-maséng, teupiléh teuma reugu-reugu nyang teupeugah nyoe:

2. Ban peuet droe aneuëk agam Asaf: Zakur, Yusuf, Netanya dan Asarela. Nyang jeuet keupeumimpén awaknyan na kheueh Asaf, nyang peusampoe peusan nibak Po teu Allah, meunyoe ka geubri tugaih lé raja.

3. Ban nam droe aneuëk agam Yedutun: Gedalya, Zeri, Yesaya, Simei, Hasabya dan Matica. Dimiyueb pimpénan ureuëng syiek awaknyan, awaknyan laju jipeusampoe peusan nibak Po teu Allah deungon musik keucapi, dan awaknyan jica-e deungon meurateb seumujoe meunan cit deungon teupeugah syukoe ubak TUHAN.

4. Ban peuet blaih droe aneuëk agam Heman na kheueh: Bukia, Matanya, Uziel, Sebuel, Yerimot, Hananya, Hanani, Eliata, Gidalti, Romamti-Ezer, Yosbekasa, Maloti, Hotir dan Mahaziot.

5. Heman na kheueh nabi pribadi raja. TUHAN geubri ban peuet blaih droe aneuëk agam nyan meunan cit lhée droe aneuëk inong ubak Heman kareuna TUHAN ka geumeujanji keu geubri keududuekan nyang teuhoreumat keu gobnyan.

6. Banmandum aneuëk Heman nyan jipeumeu-én musik simbal, keucapi dan rapa-i gambus dimiyueb pimpén ureuëng syiek gobnyan keudroe keu teuiréng upacara iébadat di Baét TUHAN. Asaf, Yedutun dan Heman meuteumé tugaih sisuai deungon nyang ka geutunyok lé raja.

7. Ban dua ploh peuet droe aneuëk agam awaknyan dan waréh kawöm awaknyan na kheueh ahli-ahli musik nyang ka teulateh. Awaknyan banmandum na 288 droe.

8. Keu teupeuteuntée gileran tugaih, awaknyan bandum jitarek undi — bah kheueh nyan nyang muda meunan cit nyang tuha, bah kheueh nyan nyang kana peungalaman meunan cit nyang ban mantong meuruno.

9. Ban 288 droe nyan teubagi teuma u dalam 24 boh keulompok meunurot keuluwarga maséng-maséng. Tieb-tieb keulompok na 12 droe dimiyueb pimpénan sidroe. Nyoe kheueh urotan nan-nan awaknyan meunurot nyang ka teu-undi: 1. Yusuf nibak keuluwarga Asaf 2. Gedalya 3. Zakur 4. Yizri 5. Netanya 6. Bukia 7. Yesarela 8. Yesaya 9. Matanya 10. Simei 11. Azareel 12. Hasabya 13. Subael 14. Matica 15. Yeremot 16. Hananya 17. Yosbekasa 18. Hanani 19. Maloti 20. Eliata 21. Hotir 22. Gidalti 23. Mahaziot 24. Romamti-Ezer