1 Tawarikh Chapter 15

1. Nabi Daud laju geupeugöt rumoh-rumoh keu droe gobnyan di Banda Daud, dan geupeusiab teumpat keu Peuto Peujanjian Allah dan laju geupasang khimah keuteumpat Peuto nyan.

2. Nabi Daud geupeugah, "Teuma ureuëng Lewi mantong nyang jeuet beuôt Peuto Peujanjian TUHAN, sabab awaknyan kheueh nyang ka geupiléh lé TUHAN keu jiseuôn Peuto nyan dan jimeungabdi ubak Gobnyan siumu masa."

3. Lé nyan teuma Nabi Daud laju geutawök banmandum ureuëng Israel mangat jijak u Yerusalem mangat jijak pinah Peuto Peujanjian TUHAN u teumpat nyang ka geupeusiab.

4. Nabi Daud laju geuyue keuturonan Nabi Harun dan ureuëng Lewi mangat jimeusapat.

5. Dan nibak kawöm Kehat, sukée Lewi, teuka kheueh Uriel nyang jipimpén 120 droe.

6. Nibak kawöm Merari teuka teuma Asaya nyang jipimpén 220 droe.

7. Nibak kawöm Gerson teuka Yoël nyang jipimpén 130 droe.

8. Nibak kawöm Elsafan teuka teuma Semaya nyang jipimpén 200 droe.

9. Nibak kawöm Hebron teuka teuma Eliel nyang jiba 80 droe.

10. Nibak kawöm Uziel teuka teuma Aminadab nyang jiba 112 droe.

11. Lé Nabi Daud laju geurawok Teungku Imeum Zadok dan Teungku Imeum Abyatar dan ban nam droe ureuëng Lewi: Uriel, Asaya, Yoël, Semaya, Eliel dan Aminadab.

12. Kheun Nabi Daud ubak awaknyan, "Gatanyoe na kheueh peumimpén kawöm nibak sukée Lewi. Kareuna nyan, bah kheueh gata dan ureuëng-ureuëng Lewi nyang laén jijak peusuci droe mangat jeuet tapinah Peuto Peujanjian TUHAN, Allah Israel, u teumpat nyang ka ulôn seudia.

13. Bak waée Peuto nyan keu nyang keuphon that teupinah, gata hana disinan keu gataba. Lé sabab nyan, TUHAN, Po teu Allah geutanyoe, geuhuköm tanyoe sabab tanyoe taseumah Gobnyan hana beutôi lagée kheun Gobnyan."

14. Deungon nyan teuma, lé teungku imeum dan ureuëng Lewi laju jijak peugleh droe mangat jeuet jipinah Peuto Peujanjian TUHAN, Allah Israel.

15. Dan bak watée Peuto nyan teupinah, awaknyan laju jibeuôt u ateueh ulôn ngon kayée geunulam, nyan na kheueh meunurot peuratoran nyang ka geubri lé TUHAN meulalu Nabi Musa.

16. Dan meunan cit lé Nabi Daud geubri tugaih keu bak padubdroe peumimpén ureuëng Lewi nyan mangat jibri tugaih keu ureuëng nibak sukée jihnyan mangat jimeuca-e ngon jipeumeu-én lagu-lagu geumbira keu keucapi dan simbal.

17. Lamkawan keuluwarga-keuluwarga nyang meuca-e nyan, awaknyan geupiléh ureuëng-ureuëng nyang teupeugah lom nyoe keu jipeumeu-én simbal peurunggu: Heman aneuëk Yoël meusajan deungon kawöm syedara jih nyang nan Asaf aneuëk Berekhya, dan Etan aneuëk Kusaya nibak kawöm Merari. Keu teuiréng awaknyan dan teupeumeu-én keucapi ngon nada su nyang manyang jipiléh ureuëng-ureuëng Lewi nyang teupeugah nan jih lagéenyoe: Zakharia, Yaaziel, Semiramot, Yehiel, Uni, Eliab, Maaseya, dan Benaya. Keu ureuëng peumeu-én keucapi nyang meusu ngon nada nyang miyueb geupiléh teuma ureuëng-ureuëng Lewi nyang nan-nan gobnyan nyang teupeugah lom nyoe: Matica, Elifele, Mikneya, Azazya, dan dua droe ureuëng kawai Baét TUHAN, awaknyan na kheueh Obed-Edom dan Yeiel.

22. Kenaya teupiléh keu ureuëng nyang jeuet keu ulée ureuëng nyang meu-én musik nibak sukée Lewi nyan, sabab gobnyan na kheueh malem keuhai musik.

23. Berekhya dan Elkana meusajan deungon Obed-Edom dan Yehia teupiléh jeuet keu ureuëng kawai Peuto Peujanjian TUHAN. Teungku imeum nyang teupeugah lom nyoe: Sebanya, Yosafat, Netaneel, Amasai, Zakharia, Benaya dan Eliezer teupiléh keu ureuëng nyang yueb beureuguih dikeue peuto nyan.

25. Dan geujak kheueh laju Nabi Daud meusajan deungon peumimpén Israel dan peuwira-peuwira u rumoh Obed-Edom keu geujakcok Peuto Peujanjian nyan deungon geupeuna peurayaan nyang paleng meugah.

26. Na tujoh boh leumô agam dan tujoh boh teuma bubiri geupeuseumah keu Po teu Allah sabab Gobnyan ka geutulông ureuëng Lewi nyang beuôt Peuto Peujanjian nyan.

27. Bak watée nyan Nabi Daud geungui bajée jubah nyang teupeugöt nibak ija lineun nyang halôh, meunan cit deungon ureuëng nyang peumeu-én alat musik dan Kenaya peumimpén awaknyan dan ureuëng-ureuëng Lewi nyang beuôt Peuto Peujanjian nyan. Meunan cit deungon Nabi Daud geungui bajée Efod.

28. Banmandum umat Israel jijak iréng Peuto Peujanjian nyan sampoe u Yerusalem deungon su seumurak nyang meuhubo, su beureuguih, siruné, simbal dan su keucapi.

29. Bak watée Peuto nyan teungoh geuba jipeutamong u dalam banda, Mikhal putroe Raja Saul jicingék nibak peuradeuen dan deuh laju jikalon Nabi Daud teungoh geumeulikak ngon geumeunari nyang meusukaria. Lé Mikhal gét that luwat geungieng buet Nabi Daud nyan.