Taitusi Chapter 2

1. Ia o iko, mo tukuna tiko na veika sa kilikili kei na i vakavuvuli dina:

2. Me ra yalomamakutu o ira na qase, me ra yaloqaseqase, me ra dauyalomatua, me vinaka na nodra vakabauta, me ra daulomasoli, me ra dauvosota vakadede;

3. O ira talega na yalewa qase, me ra dau ia na i valavala sa kilikili kei ira e ra sa yalosavasava, me ra kakua ni dauveibeitaki vakailasu, me ra kakua ni daugunu yaqona me ra vakatavulica na ka vinaka “

4. Me ra tuberi ira na yalewa gone me ra lomani ira na watidra, ka me ra lomani ira talega na luvedra.

5. Me ra lomavuku, me ra lomasavasava, me ra dautiko vakadua mai nodratou, me ra dauyalovinaka, me ra dauvakamalumalumutaki ira vei ira na watidra me ra dautalairawarawa talega, me kakua kina ni vosavakacacataki na Vosa ni Kalou.

6. Vakarota talega vei ira na cauravou me ra yalomatua.

7. Ena ka kecega mo sa i vakarau, ena cakacaka vinaka; me kakua ni cala na nomu i vakavuvuli, mo yalomatua ka yalosavasava.

8. Na vosa vakadodonu ena sega ni lewai me ca, me rawa ni madua kina o koya e veisaqa, me kakua kina ni dua na ka ca me ra dusi iko kina.

9. Me ra talairawarawa vei ira na nodra Turaga o ira na tamata, me ra cakava na ka kecega sa vinaka vei ira, ka me ra kakua ni dauvosa lesu tale.

10. Ka me ra kakua sara ni daubutako, me ra vakatakilai ira ni ra sa lomadina, ka vinaka me ra vakaraitaka na i vakavuvuli dina ni Kalou na noda i Vakabula ena ka kecega.

11. Ni sa rairai na loloma ni Kalou, o koya sa vuni bula vei ira kecega na tamata.

12. A sa vakavulici keda, meda biuta na i valavala sa sega ni vakalotu kei na gagadre ca vakavuravura, meda ia na i valavala vakayalomatua, ka yalododonu, ka vakalotu ena vuravura oqo.

13. Ni da waraka na i nuinui bulabula kei na Nona rairai vakaiukuuku, na Kalou levu ka noda i vakabula o Jisu Karisito,

14. O koya sa soli Koya ena vukuda, me voli keda mai na bula i valavala ca kecega, me vakasavasavataki keda Vua meda Nona tamata talei, ka meda lomakatakata ena cakacaka vinaka.

15. A veika oqo mo vosataka ka vakarota ka vunautaka vakabibi sara. Me kakua ni dua me beci iko.