Filimone Chapter 1

1. Oi au o Paula, sa vesu tu ena vuku i Jisu Karisito, kei Timoci na wekada, vei Filimoni o koya keirau sa daulomana, na neirau i tokani,

2. Vei Afia talega na wekada yalewa, vei Akipo talega na neirau i tokani ena i valu oqo, vei ira talega na i soqosoqo lewe ni lotu era sa tiko ena nomu vale:

3. Me nomudou na loloma, kei na vakacegu, mai Vua na Kalou o Tamada, kei na Turaga o Jisu Karisito.

4. Au sa vakavinavinaka vua na noqu Kalou, ni'u sa cavuti iko ena veisiga ena noqu qaqa ni masu,

5. Ni'u sa rogoca na nomu loloma kei na nomu vakabauta Vua na Turaga o Jisu, kivei ira kece talega sa lotu,

6. Me kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, ena vuku i Karisito Jisu.

7. Ni sa levu na neitou reki kei na vakacegu ena vuku ni nomu loloma, na wekaqu, ni o sa vakaceguya na lomadra era sa lotu.

8. O koya oqo au sa doudou kina ena vuku i Karisito, me'u vakarota vei iko na ka e dina,

9. Ena vuku ni nodaru veilomani ga ka'u sa vinakata kina me'u sa vakamamasu ga, ni oi au o Paula na qase, ka'u sa vesu talega e daidai ena vuku i Jisu Karisito.

10. Au sa vakamasuti iko ena vuku ni luvequ o Onisimo, o koya ka'u sa susuga cake ni keirau a vesu tu.

11. O koya sa sega ni yaga e liu vei iko, ia oqo sa qai yaga vei iko, vei au talega.

12. Au sa vakatalai koya lesu tale yani vei iko. O koya oqo mo vakacegui koya e na loloma ni sa vaka ga e tiki ni yagoqu dina sara.

13. Au vinakata me sa tikoga vei au, me kemu i sosomi me sa qaravi au e na noqu vesu tu, e na vuku ni Tukutuku Vinaka.

14. Ia ni'u se sega ni kila na lomamu, au se sega ni via cakava e dua na ka, me kakua ni vaka na ka ni vakasaurara na nomu loloma, me sa yalomu ga kina.

15. O koya beka oqo sa lako tani yani kina vakalekaleka, mo tauri koya vakadua.

16. Me kakua ni vaka e dua e bobula vei iko, me uasivi cake mai vei ira na bobula me tacimu ka wekamu voleka, e vakalevu sara vei au ia ka vakacava mada vei iko, ni sa wekamu vakayago ena vuku ni Turaga.

17. Kevaka o wiliki au tiko me nomu i tokani, mo ciqomi koya me vakataki au.

18. Ia kevaka e dua na ka e cala kina vei iko se tu na nona i dinau vei iko, mo vola vei au.

19. Oi au o Paula, au sa vola ena ligaqu dina. Au na sauma lesu ka'u na sega ni na tukuna vei iko ni sa dodonu ga mo noqu talega o iko.

20. Io, taciqu, me'u rekitaki iko mada ena Turaga; vakaceguya na lomaqu ena vuku i Karisito.

21. Ni ka'u sa vakadinata ni o na talairawarawa kina, ena ka au sa vola yani oqo vei iko, ni'u sa kila o na vakayacora me uasivi sara.

22. Ia mo vakarautaka talega e dua na vale me'u moce kina, ni'u sa vakabauta ni nomudou masu au na sauma lesu tale vei kemudou.

23. O Epafira na noqu i tokani keirau vesu vata tu ena vuku i Jisu Karisito, sa loloma yani,

24. Vaka talega kina o Marika, o Arisitako, o Timasa kei Luke oi iratou oqo na noqu i tokani.

25. Na loloma ni noda Turaga o Jisu Karisito me tiko ena yalomudou. Emeni.