Dauvunau Chapter 9

1. Sa vakananuma na ka kece oqo ena lomaqu, me rawa ni'u na vakaraitaka yani, Ni o ira na yalododonu kei ira na yalomatua kei na nodra cakacaka kecega sa tiko ena liga ni Kalou. Na tamata sa sega ni kila na loloma se na veicati, ena vuku ni ka sa tu e matadra.

2. Sa yaco na ka e vakatautauvata vei ira kecega: Na ka sa yaco vua na yalododonu sa yaco talega vua na yaloca; Na ka sa yaco vua sa savasava sa yaco talega vua sa sega ni savasava; Na ka sa yaco vua sa vakacaboi soro yaco talega vua sa sega ni vakacaboisoro, vua sa vinaka, vua talega sa ca vua sa bubului, vua talega sa sega ni bubului.

3. Sa dua na ka ca sa caka tiko ena ruku ni matanisiga oqo: ni sa dua ga na ka sa yacovi ira kece tiko na tamata. Sa dina, na yalodra kece na tamata sa sinai ena ka ca; na lialia sa tu e lomadra ni ra sa bula tiko, ni oti o ya era sa lako ki na mate.

4. Ia, o koya sa sema ki vei ira na bula, sa dua nai nuinui vei koya, ni sa vinaka cake na koli sa bula tiko mai vei koya na laione sa mate tu.

5. O ira na bula era sa kila tiko ni ra na mate; o ira na mate era sa sega ni kila, sa sega na ka me ra saumi tale kina, e ra sa guilecavi vakadua.

6. Na nodra loloma, na nodra veicati, na nodra vuvu sa oti vakadua; sa sega tale na ka e nodra ena ruku ni matanisiga oqo.

7. Lako, kania na kemu madrai ena marau, gunuva na memu waini ena reki; ni sa raica oti na nomu cakacaka na Kalou.

8. Me vulavula tiko na nomu i sulu, ka me lumuti tikoga na ulumu.

9. Mo marautaki watimu tikoga, o koya o sa lomana ena veisiga kece ni nomu bula wale oqo, o koya sa solia vei iko na Kalou ena ruku ni matanisiga oqo, oqori sa nomui votavota ni bula ena vuku ni cakacaka o sa cakava ena ruku ni matanisiga oqo.

10. Na ka sa kunea na ligamu mo cakava, cakava ena nomu kaukauwa kece, ni sa sega na cakacaka, se na kila, se na yalomatua ena i bulubulu, eda sa lako tiko kina oqo.

11. Au sa lesu mai ka raica, ni sa sega ni ra cici na daucici”se ra vala na kaukauwa, se ra kana na yalomatua, se era vutuniyau ga na yalomatua, se era sa cakacaka ga na kena dau; sa yaco na gauna kei na veisau vei ira kecega.

12. Ni sa sega ni kila na nona gauna na tamata, me vaka na ika sa coko ena lawa, me vaka na manumanu sa biriki ena dai, sa vaka kina o ira na luve ni tamata ena nodra coriti ena gauna ca oqo, ni sa lutuki ira vakasauri.

13. Au sa raica talega na yalomatua ena ruku ni matanisiga, ka sa vinaka sara vei au:

14. Sa dua na koro lailai ka sa tiko kina e vica ga na tamata; sa dua na tui sa mai valuta ka taura vakaukauwa, sa cakava sara na dai me vakavolivolita.

15. Sa kunei e kea e dua na tamata yalomatua ia sa dravudravua, o koya oqo ena nona yalomatua sa vakabula kina na koro. Io, sa sega ni dua e nanuma na tamata o ya.

16. Au sa qai tukuna: "na yalomatua sa vinaka cake, mai na kaukauwa, e dina ga sa vakawaletaki na yalomatua ni tamata, kei na nona vosa sa sega ni rogoci.

17. Na vosa ni yalomatua sa vosataki vakamalua me rogoci, mai na nodra kaikaila na veiliutaki lialia.

18. Na yalomatua sa vinaka cake mai na i yaragi ni valu; ia e dua na tamata i valavala ca, sa vakacacana e vuqa na ka vinaka."