Keujadian Chapter 40

1. Na meupadub treb teuma óh lheueh nyan dua droe peulayan raja nanggroe Meusé, bandua droe awaknyan na kheueh nyang urôh ié jieb dan nyang urôh ruti raja, ka jipeubuet buet nyang salah ateueh po raja.

2. Dan beungéh that raja ubak mandua droe peulayan nyan,

3. dan laju awaknyan jipeutamong lam glab di rumoh keumeundan nyang kawai meuligoe, bak teumpat Nabi Yusuf keunong teun.

4. Treb cit awaknyan lam glab nyan, dan keumeundan kawai meuligoe jibri tugaih ubak Nabi Yusuf mangat geupeutimang awaknyan.

5. Bak simalam ureuëng urôh ié jieb dan ureuëng nyang urôh ruti raja nyan maséng-maséng laju meulumpo. Makna lumpo awaknyan hana saban.

6. Watée Nabi Yusuf geujak bak awaknyan óh singoh beungoh, awaknyan deuh jih seudeh lumpah na.

7. Laju geutanyong lé Nabi Yusuf bak awaknyan, "Pakon gatanyoe mandua deuh jih seudeh that-that nibak uroe nyoe?"

8. Jaweueb awaknyan, "Beuklam kamoe meulumpo, dan hana nyang teupeu peue makna lumpo kamoe nyan." Geujaweueb lé Nabi Yusuf, "Po teu Allah nyang geubri keumungkenan ubak manusia keu jipeutrang makna lumpo. Cuba gata peugah peue lumpo gata nyan."

9. Nyang urôh ié jieb jara nyan jipeugah, "Lam lumpo nyan na deuh ulôn ngieng bak anggô dikeue ulôn.

10. Bak anggô nyan meucabeueng lhée. Banmantong cabeueng-cabeueng nyan jipeuphon meuôn, bagaih that bungöng-bungöng jih keumang, dan boh jih pi laju masak.

11. Bak watée nyan ulôn teungoh lôn mat glaih teumpat jieb ié raja, jadi laju ulôn cok boh anggô nyan dan ulôn praih laju ié jih lam glaih raja, dan ulôn peuhidang laju ubak gobnyan."

12. Geujaweueb Nabi Yusuf, "Nyoe kheueh makna lumpo gata nyan: Lhée boh cabeueng nyan muphom jih lhée uroe.

13. Lam lhée uroenyoe raja teuma geupeubeubaih gata, gobnyan geupeuamphon gata dan geubri ubak gata jabatan nyang gata mat yoh masa ilée. Dan gata teuma gata peuhidang glaih teumpat jieb ié raja keu raja lagée nyang gata peubuet yoh masa ilée.

14. Teuma ingat kheueh ubak ulôn meunyoe keuadaan gata ka gét. Tulông gata peusampoe soai ulôn nyoe ubak raja, mangat ulôn geupeubeubaih nibak lam glab nyoe.

15. Sabab, nyang sibeuna jih ulôn nyoe jibaplueng nibak nanggroe ureuëng Ibrani dan disinoe pih, di nanggroe Meusé nyoe, hántom na ulôn peubuet peue-peue mantong buet nyang jeuhet sampoe ulôn jipeutamong lam glab nyoe."

16. Óh ka lheueh tukang urôh ruti nyan jiteupeue makna lumpojih, rakan jih sidroe teuknyan galak that, sabab makna lumpo nyan gét, dan jihnyan pih jipeugah ubak Nabi Yusuf, "Ulôn pih na meulumpo, rasa jih na ulôn seuôn lhée boh raga ruti ateueh ulée lôn.

17. Lam raga nyang paleng ateueh na meubagoe rupa kue peunajoh raja, teuma cicém-cicém laju jiteuka jijak pajoh kue-kue nyan."

18. Geujaweueb lé Nabi Yusuf, "Nyoe kheueh muphom jih lumpo gata nyan: Lhée boh raga nyan muphom jih lhée uroe.

19. Lam lhée uroenyoe raja teuma geuyue bakgob keujijak koh takue gata dan laju jigantung manyét gata bak saboh taméh, dan cicém-cicém laju jiteuka jijak pajoh asoe gata."

20. Lhée uroe óh lheueh nyan na kheueh uroe ulang thon raja, gobnyan geupeuna khanuri rayeuk keu banmandum peugawai geuh. Gobnyan laju geubri peurintah mangat nyang urôh ié jieb dan nyang urôh ruti teupeuteubiet lam glab dan jiba laju ukeue banmandum peugawée meuligoe.

21. Tukang urôh ié jieb raja laju teupeugisa ubak buet jih yoh awai.

22. Teuma nyang urôh ruti raja teuhuköm maté. Banmandum nyan teujadi paih lagée nyang ka lheueh geupeugah lé Nabi Yusuf.

23. Dan tukang urôh jieb ié raja hana le teuingat ubak Nabi Yusuf. Dan biet-biet that jihnyan ka tuwoe keu gobnyan.